Վեբ բրաուզերը (անգլ. Web browser), ծրագրային ապահովում է, որը նախատեսված է վեբ-կայքեր դիտելու համար, այսինքն վեբ կայքերին դիմելու, դրանցից ստացված ինֆորմացիան վերամշակելու, կայքը արտածելու և մի էջից մյուսը անցնելու համար:

Բրաուզերների մեծ մասը հնարավորություն ունի նաև ցույց տալու FTP սերվերների բովանդակությունը: Համաշխարհային ցանցի ստեղծման օրվանից բրաուզերները անընդհատ կատարելագործվել են և ժամանակի ընթացքում ավելի ու ավելի է մեծանում դրանց կարևորությունն ու պահանջարկը: Այժմյան բրաուզերը վեբ-կայքի մշակման և արտածման համար նախատեսված ծրագրային համակարգ է, որն իրենից ներկայացնում է վեբ-կայքի և իր հաճախորդի միջև միջանկյալ օղակ, միջավայր: Գրեթե բոլոր հայտնի բրաուզերները տարածվում են անվճար այլ լրացնող ծրագրերի հետ միասին. Internet Explorer ( Microsoft Windows-ի հետ միասին), Mozilla Firefox (անվճար,ազատ ծրագրային ապահովում), Safari (Mac OS-ի հետ կամ անվճար Windows-ի համար), Opera (անվճար սկսած 8.50 տարբերակից), Google Chrome (անվճար,ազատ ծրագրային ապահովում):